ಮೊದಲ ಮಾತು

ಆತ್ಮೀಯರೇ, 

ಇಂದು ಶಾಲೆಗಳ ಪುನರಾರಂಭ.ಚಿಲಿಪಿಲಿಗುಟ್ಟುವ ಹಕ್ಕಿಗಳಿಲ್ಲದೇ ಬಿಕೋ ಎನ್ನುತ್ತಿದ್ದ ಶಾಲಾ ಅಂಗಳಕ್ಕೊಂದು ಭವ್ಯ ಕಳೆ ಬರುವ ದಿವ್ಯ ಸಮಯ.ವಲಸೆ ಹೋದ ಪಕ್ಷಿಗಳೆಲ್ಲ ಪುನಃ ಧಾಮಕ್ಕೆ ಮರಳುವ ಅಪೂರ್ವ ಘಳಿಗೆ. ಸ್ತಬ್ಧವಾಗಿದ್ದ ತರಗತಿಯ ಕೋಣೆಗಳಲ್ಲಿ ಜ್ಞಾನದಾಸೋಹ ಪುನರಾರಂಭಗೊಳ್ಳುವ ಅಮೋಘ ಕ್ಷಣ.ಖಾಲಿಯಾಗಿದ್ದ ಕಪ್ಪು ಹಲಗೆಗಳ ಮೇಲೆ ಮತ್ತೆ ಅಕ್ಷರಗಳು ಅರಳುವ  ಆವಿಸ್ಮರಣೀಯ ಸಂದರ್ಭ. ಮೌನವಾಗಿದ್ದ ಶಾಲಾಘಂಟೆ ಪುನಃ ಕಿವಿಯಲ್ಲಿ ಹಿತವಾದ ಸದ್ದು ಮೊಳಗಿಸುವ ಶುಭಕಾಲ.

  ಹೌದು. ಮೇ 30 ರಂದು ಶಾಲೆಗಳಿಗೆ ಪ್ರಾರಂಭೋತ್ಸವ. ನವ ಶೈಕ್ಷಣಿಕ ಮನ್ವಂತರದ ಆರಂಭ. ಆರಂಭಗೊಂಡ ಮತ್ತೊಂದು ಶೈಕ್ಷಣಿಕ ಪರ್ವ. ತೆರೆದುಕೊಂಡ ನಮ್ಮ ವೃತ್ತಿ ಬದುಕಿನ ಇನ್ನೊಂದು  ಪುಟ. ಕಣ್ಣಲ್ಲಿ ಹೊಸ ಕನಸುಗಳನ್ನು ಹೊತ್ತುಕೊಂಡು, ಮನಸಿನಲ್ಲಿ ಮಹತ್ತರವಾದ ಹೊಸ ಆಸೆಗಳನ್ನು ಇಟ್ಟುಕೊಂಡು ಶಾಲೆಯ ಕಡೆಗೆ ಹೆಜ್ಜೆ ಹಾಕಬೇಕಾದ ದಿನ.

  ಬಂಧುಗಳೇ, ಬಹಳಷ್ಟು ಆಧುನಿಕ ಬದಲಾವಣೆಗಳೊಂದಿಗೆ ಈ ಶೈಕ್ಷಣಿಕ ವರ್ಷವನ್ನು ನಾವು ಬರಮಾಡಿಕೊಳ್ಳುತ್ತಿದ್ದೇವೆ. ಬೋಧನಾ ವಿಧಾನ, ಕಲಿಕಾ ಶೈಲಿ, ಮೌಲ್ಯಮಾಪನ...ಹೀಗೆ ವಿವಿಧ ಕ್ಷೆತ್ರಗಳಲ್ಲಿ ಬಹಳಷ್ಟು ಸ್ಥಿತ್ಯಂತರಗಳಾಗಿವೆ. ಆರಂಭದಲ್ಲೇ  ನಿರಾಶೆಗೊಳ್ಳದೆ ನಾವು ಆ ಬದಲಾವಣೆಗಳನ್ನು ಮುಕ್ತವಾಗಿ, ಪ್ರಾಂಜಲ ಮನಸ್ಸಿನಿಂದ ಸ್ವೀಕರಿಸೋಣ. ಆ ಬದಲಾವಣೆಗಳು  ನಮ್ಮ ವೃತ್ತಿ ಬದುಕಿಗೆ , ದಕ್ಷತೆಗೆ, ನೈಪುಣ್ಯತೆಗೆ ಆಧುನಿಕ ಜಗತ್ತು ಒಡ್ಡಿದ  ಸವಾಲು ಎಂದುಕೊಳ್ಳೋಣ. ಡಿಜಟಲ್ ಯುಗದ ಅಗತ್ಯತೆಗಳಿಗೆ  ಹೊಂದಿಕೊಳ್ಳೋಣ. ತಂತ್ರಜ್ಞಾನ  ಬಳಸಿ ಬೋಧಿಸುವಲ್ಲಿ ನಿಷ್ಣಾತರಾಗೋಣ. ಜಗತ್ತು ಸಾಗುತ್ತಿರುವ ವೇಗಕ್ಕೆ ತಕ್ಕಂತೆ  ಹೆಜ್ಜೆ ಹಾಕೋಣ. ಬೋಧನಾ ಶೈಲಿಯಲ್ಲಿ ಮತ್ತಷ್ಟು ಹೊಸತನ ತಂದುಕೊಳ್ಳೋಣ. ವಿದ್ಯಾರ್ಥಿಗಳು ಅನುಸರಿಸಬಲ್ಲ ಇನ್ನಷ್ಟು ಆದರ್ಶಪ್ರಾಯವಾದ ವ್ಯಕ್ತಿತ್ವ ರೂಪಿಸಿಕೊಳ್ಳೋಣ. ಕಾಯಕದಲ್ಲಿ ಇನ್ನಷ್ಟು ನಿಷ್ಠೆ, ಶ್ರದ್ಧೆ ರೂಡ್ಹಿಸಿಕೊಳ್ಳೋಣ. ಶಾಸನದ ನಿಯಮಗಳಿಗೆ, ವೃತ್ತಿಧರ್ಮಕ್ಕೆ ಬದ್ಧರಾಗೋಣ. ಉತ್ಸಾಹಿಗಳಾಗೋಣ. ಕ್ರಿಯಾಶೀಲರಾಗೋಣ. ಪ್ರಯೋಗಶೀಲರಾಗೋಣ. ಒಟ್ಟಿನಲ್ಲಿ ಈ ನವ ವಸಂತವನ್ನು ಸಾರ್ಥಕಗೊಳಿಸೋಣ. ಸಮಾಜಕ್ಕೆ ವಿಶಿಷ್ಟವಾಗಿ ಚಿಂತಿಸುವ ಪ್ರಜೆಗಳ ಕೊಡುಗೆ ನಿಡೋಣ.

ತಮ್ಮ ಸೇವೆಯಲ್ಲಿ

ಶ್ರೀ.ಈರಣ್ಣ.ಯ.ಕಾಂಬಳೆ 

ಸಹ ಶಿಕ್ಷಕರು